Rusiya Federasiyasının Təhlükəsizlik Şurası katibinin müavini Oleq Xramovun rəhbərlik etdiyi nümayəndə heyəti Azərbaycan Respublikasında səfərdə olub
Rusiya Federasiyasının Təhlükəsizlik Şurası katibinin müavini Oleq Xramovun rəhbərlik etdiyi nümayəndə heyəti 2023-cü il mayın 2-də Azərbaycana səfərə gəlib.
Mayın 3-də digər aidiyyəti dövlət qurumları nümayəndələrinin də iştirakı ilə ötən il hər iki ölkənin hökumətləri tərəfindən imzalanmış “Beynəlxalq informasiya təhlükəsizliyi sahəsində əməkdaşlığa dair Saziş”in müddəalarının həyata keçirilməsinin səmərəliliyinin artırılmasını nəzərdə tutan müvafiq icra planının razılaşdırılması üzrə məsləhətləşmələr keçirilib.
Görüşdə Azərbaycan Respublikası Təhlükəsizlik Şurasının katibi Ramil Usubov qonaqları səmimi salamlayaraq, ölkələrimiz arasında əməkdaşlıgın bir çox sahələrdə uğurla inkişaf etdiyini, dövlət başçıları - cənab İlham Əliyevin və cənab Vladimir Putinin siyasi iradələrinə uyğun olaraq, strateji tərəfdaşlıq münasibətlərinin yeni mərhələyə qədəm qoydugunu, əlaqələrin inteqrasiyası prosesində təhlükəsizlik fəaliyyətinin önəmli yer tutduğunu diqqətə çatdırıb.
Rusiya Federasiyasının Təhlükəsizlik Şurası katibinin müavini Oleq Xramov tədbirin və beynəlxalq informasiya təhlükəsizliyi sahəsində birgə səylərin əhəmiyyətini vurgulayıb, eyni zamanda, azərbaycanlı həmkarlarının günümüzün bu çox aktual probleminin həlli yolundakı dəyərli fəaliyyətlərini yüksək qiymətləndirib.
Görüşdə Rusiya Federasiyasının ölkəmizdəki fövqəladə və səlahiyyətli səfiri Mixail Boçarnikov da iştirak edib.
Rusiya Federasiyası Təhlükəsizlik Şurasının nümayəndə heyəti həmin gün Azərbaycan xalqının Ümummilli Lideri Heydər Əliyevin məzarını ziyarət edib.